生肖改運 養貓嫁得出你都信?

壹NEXT

2018年04月19日

早前娛樂界某位女士聽從一名風水大師所言，領養隻貓增旺姻緣，究竟貓星人是否有助桃花？記者養了三貓一狗，深感貓狗等同人類，都係造屎機，天天餵食，晚晚執屎，都幾搵自己笨，桃花就唔多覺眼。

其實你有無養貓，跟你夜晚瞓覺攬住老公定係啤啤熊，根本無關係。十二地支（生肖）中的「寅」內藏木火元素，寅即是虎，虎屬貓科，可能你的八字要靠木火催旺姻緣，但大運、流年行極都行唔到寅運，所以某某大師勸你養貓，咁仲有一絲希望嫁得出－－條公式咁鬼複雜，我唔信你明囉，難為你信得落。

李應聰師傅解釋，古人不大識字，只好利用身邊動物，取其類像記錄日子，年月日時各有生肖，例如哪天阿仔出世，哪天衰佬走咗佬。問題係十二生肖在不同年代、不同國家，代表動物也不同，不能直接將貓與寅掛勾。

根據英國某徵友公司調查發現，每周為寵物花一百英鎊的男性無女人吼；四份一男人抗拒養貓兩隻或以上的女性，三成女性討厭衰佬俾隻貓瞓自己枕頭－－聽落，似乎，養貓趕客多啲喎。

睇你個款，都係想叫個靚仔上你屋企睇貓，之後耶唔好啦，最怕你不管大功告成還是功敗垂成，棄養隻貓。就當你鄧櫈櫈櫈，婚姻幸福浪漫滿屋，請想想隻貓流落行頭。如果你份人係咁，人哋做隻貓做隻狗，都唔做你情人。

。。。。。

我以下有一點小意見。

當中國術數被加入了玄學的神鬼學法術之類作改運便變得難以作正統學術理法去解說和推証了。再者，現今的玄學界也走進混入了娛樂界，既然已有娛樂成分，也不用太緊張和認真去看待了。清者自清，故迷者也會自然地被迷惑了。命也，運也！

再者，古人 “並非” 不大識字，只好利用身邊動物，取其類像記錄日子，年月日時各有生肖。天干地支代入人世萬物，可追源至 隋朝的《五行大義》著作，其作用也與易學的八卦代入萬物一樣作結象上的占卜，推算等作用，當然也有作為曆法上記錄又或轉換功能。