官邸風水可無問題

曾智華 - 「惡頂」官邸｜祿祿無窮

2022-06-22

七月一日，政府大換班，一連串人事大調動，立即展開。另外，有一連串「嘢」都要郁，正是高官的官邸安排。

由殖民地時代開始，有冇官邸住，乃官員級數的重要顯示。一般公務員，升到咁上下，就可以入住「政府豪宅」，不少在半山區，間間二三千呎，真係爽死。因香港地價咁鬼貴，正常人，打十世工都未必買到太平山腳的單位。

故此，不少高級公務員，幾大都爭取住「政府豪宅」，歎歎只有極級富豪才可以享受到的環境。

不過，一啖砂糖一啖屎，到你退休時，大大鑊，必須由半山區撻返落草根市區，重回普通市民住的屋苑。由儉入奢易，但住慣半山三千呎，再「走入尋常百性家」，好冇癮㗎！

香港幾位頂級大官更勁，包括特首及三司，人人有殖民地傳承下來的優雅建築一座作官邸。
不過咁，並不是個個大官都想住入去。首先是稱督憲府的禮賓府（圖）。頂層權力，江湖個個知，自從中銀總部興建後，真係邊個住入去，邊個行衰運。小弟當年訪問風水大師蔡伯勵，佢都搖搖頭：「好惡搞！」

結果，衞奕信行山跌甩下巴兼被炒魷。尤德在任逝世。彭定康抵港即心臟病。過渡後，就算董建華唔住，都冇好日子過。之後的曾蔭權坐監、梁振英及林鄭……總之，唉的一聲啦！

李家超將會點，未知。風水界好有興趣睇也。

曾智華

---------------------------------------
曾智華 - 唔住豪華官邸之因｜祿祿無窮

祿祿無窮 2022-06-28

早前，本欄出咗篇——「惡頂」官邸，引起不少人好奇追問。全因小弟早年訪問風水大師蔡伯勵，佢早指出中銀大廈建成後，禮賓府（前港督府）的風水好惡搞。結果，歷任港督及特首，皆出這樣那樣的問題。連董建華堅拒入住，寧願返自己屋企瞓，運程也「不能倖免」地差。
今番輪到超哥住，且看佢能否鎮得住。

政府頂級官員官邸，個個在山頂，最高幾個，更全部是歐洲式古老建築，件件古董，全屬無價寶。所以，「正常人」必定幾大都入去住下，感受高高在上的氣派與品味！何況，更有政府出埋錢大裝修？

不過，現實上，又非個個都想住㗎。眾所周知就是董建華。另一位，正是行將離任的律政司司長鄭若驊！

唔知乜原因。大家可記得佢二〇一九年在英國跌斷手？之後，被召到北京，回港後就不再住官邸了。點解，得佢自己才知。

結果， 當年十二月開始，律政司司長官邸，變為只作款待客人用。大大座山頂施勳道十號的古典豪宅，就此空置至今。（圖）

究竟，林定國又會否入住呢？

某日，與一前高官閒談，佢話：「碌Sir，其實唔係個個都喜歡住官邸㗎！因為，有種被人監視嘅感覺，絕不過癮！」

點解？因高官的司機、秘書、管家、廚師……全非自己請，咁，你點知佢哋可會另有「角色」？

曾智華

後話

其實，江湖上有不少神級又或天皇级風水大師，可高價聘請其中一又或組成個風水專案顧問團去察看和改喜風水，再佈個三元不敗局，例如『乾山乾向乾水流』局，『七星打劫』，又或『旺山旺向』丁財倆旺之類便可安心入住了。當然仍要找蔡大師後人掌門幫忙擇個良辰吉日入伙。入伙後，再以《奇門遁甲》法找出每日何門出入至吉，又每天穿何顏色作趨旺，必會大吉大利，一切順風順水。