立法會討論公廁管理 議員引述內地人指香港冇內地咁乾淨
立法會食物安全及環境衞生事務委員會今早（18 日）開會討論智能公廁系統，旅遊界議員姚柏良引述內地人批評，現時香港的公廁衞生比以往差，反而內地更加乾淨。環境及生態局副局長黃淑嫻稱，已針對遊人多的公廁派駐廁所事務員。對於月初發生的荔枝窩智能公廁跑手被困事件，她形容是初始問題，使用者未習慣免觸式電子鎖使用方法。
姚柏良稱，很多郊野公園或者熱門行山徑，以及鄉郊地區公廁仍有很大進步空間。他說，最近接待了一批內地來港老師及學生參觀立法會，問他們對香港的印象，「其中一個答案我都幾驚訝，佢哋覺得香港冇以前咁乾淨」。
環境局：旅遊熱點會派駐廁所事務員
姚柏良認為，可能是內地近年整體市面潔淨程度及公廁質素提升均有大躍進，「所以佢哋（內地人）來到香港體驗到，反而覺得香港冇內地咁乾淨，呢個係響起一個警號，我哋係需要喺呢方面加強，公廁嘅潔淨程度其實好直接影響遊客對我哋香港嘅印象。咁而家內地進步得咁快，我哋行得慢啲，都已經係好大落後」。
環境及生態局副局長黃淑嫻回應稱，同意一個城市的廁所衞生情況，直接影響旅客的觀感。針對旅遊熱點範圍內的廁所，局方一直與旅遊事務署保持密切溝通。一些周末特別多人使用的廁所，譬如北區，局方會派駐廁所事務員在周末提供服務，以維持廁所的管理及服務水準。
田北辰：設計公廁嘅人冇乜智能
實政圓桌議員田北辰就本月（12 月）9 日越野賽跑一名參加者被困荔枝窩公廁事件提出質詢，指出廁所內沒有緊急聯絡掣及其他緊急聯絡方法，「最後個跑手係用最傳統嘅方法，拍門大叫，去解決呢個智能問題。而家畀我個印象，個公廁就好有智能，但係設計嘅人就冇乜智能」。
黃淑嫻證實荔枝窩公廁跑手被困事件屬實，她解釋，荔枝窩智能廁所 11 月才完工，當然可能會有一些初始問題。她指出，智能廁所使用電子鎖，但有使用者會繼續使用人手門鎖，「其實佢有兩個掣嘅，一個掣就咁揮手就鎖咗，另一個掣你揮手佢就開，免觸式㗎嘛。但係與此同時有啲使用者會用（手動）門鎖⋯⋯因為如果你一用咗手動，電子鎖係開唔到，所以佢就要知道邊個方向係開，邊個方向係閂，佢就會出到去囉」。她續指，智能廁所其實內外均設有緊急掣，只要打爛緊急掣，就可以關掉電源，手動打開廁所門。
後話
智能廁所問題，是設計者的智能高低出了問題？或是涉及用者智能高低問題？然而，討論和解決問題，又否在乎參與者智能高低有所影響呢？
又是否問題在缺乏智能廁專才？
没有评论:
发表评论