笑到最後｜如何反駁香港玩完歪論（高明）
前中國大好友羅奇以「香港已玩完」為文章題目搵交嗌，暫時反駁隊接招只得中國港交所（0388.HK）史主席美倫，陣容已經單薄，回應竟然係「香港作為自由及開放市場….」。
美股外幣即時報價 多國新聞任睇
比起呢啲寫喺場刊冇人睇嘅理由，香港市場明顯有更多現在及未來嘅理據可以駁到羅奇口啞啞，以下求其執三個益街坊：
一、香港就快立資產增值稅
羅奇對香港悲觀，一個未寫嘅原因就係香港未納資產增值稅，從而令特區財政結構未夠穩定，從而帶來主權評級風險，從而令國際投資者唔敢喺香港落大注。
不過，特區官員已經接二連三放風會推行資產增值稅，最終相信必定會立法。到時投資者自然會返嚟。正如本欄喺「港股新年連跌 因為未有資產增值稅」一文指出，資產增值稅立法後主要市場隨後指數都係升，立法後港股上升只係時間問題。
羅奇到時見到香港有資產增值稅，隨時技癢出山，唔做教授搬去中國香港炒股。
二、港股最美麗的風景是莊家股
恒指點數自07年港股直通車後維持唔上唔落狀態已經超過15年，最好只不過係重上3萬點樓上。然而，中國走資潮最旺嘅時，恒指亦都冇明顯突破，但一樣維持紙醉金迷。當時嘅莊家收市後私人酒吧夜繽紛時段，飲大兩杯「哈哈哈恒指納入殼股一早三十萬點」。港股最美麗嘅風景就係莊家股，莊家股亦係市場一部份。
美股亦一樣有SPAC，一樣有其他莊家活動。但係多年嚟中國港交所有意無意同市場莊家保持距離，作為盛事之都，何不邀請本地知名莊家搞一系列「作品展」，講述當時點樣「畫圖」，再由特首頒授勳章，兼一記笑容燦爛擁抱。
英美亦只係國際嘅一部份，另一部份沙地俄羅斯都係國際，見到呢種畫面，一樣咁有錢嘅沙地俄羅斯財閥都會識做。
到時就算英美資金想返嚟，沙地俄羅斯等國際投資者都坐滿頭圍，二圍用膳啦。
三、香港人炒美股日股好易
除咗莊家係市場一部份，帶有強烈香港仔精神嘅本地投資者都係重要成員，一日有香港仔精神，一日香港就未玩完。正如史主席美倫所言，每次中國香港均能證明實力和韌力，實力同韌力都係嚟自香港人。香港仔精神就係走位靈活，港股依家未得，就轉場炒美股。日股破頂，又吸引另一班人炒日股。香港資金自由進出，幾個掣啲錢已經由港股轉美股美債。
只要香港人一直有錢，就有市場，就有人嚟搵客，情況有如國際邁亞美一樣係美資，一樣嚟香港搵客。而國際邁亞美訪港見證，雖然官方唔知價，但民間出得起錢，對外資嚟講，香港真係一塊福地。
高明
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
後話
果然係高明！九吾搭八搞笑式回應，勝過早前見報果D空洞反駁。起碼可得啖笑！也算是天才。
上文末謂「只要香港人一直有錢，就有市場，就有人嚟搵客」這是基於一假設在香港人一直有錢吧！也只站在消費能力和零售市埸上而言的所謂吸引力吧？
然而錢從何來？
若政府缺錢，金融貿易經濟不濟，失業率上升， …… 那又會如何？
只一個「國際邁亞美訪港」所謂作為見證，便沾沾自喜，須知這並非一項西方投資建設，而是短時間來賺你錢發你財後離去。
没有评论:
发表评论