資金遺棄港股 美股更值博逢低吸納？

【盤房來料】資金遺棄港股 美股更值博逢低吸納

信報   今日 14:10

隔晚美股繼續反覆，但因為金管局再承接港元沽盤，港滙持續走弱，再度觸及弱方保證，令港股昨日回吐131點後，今日繼續走軟，不過10天線(20457)失而復得，但大市半日成交額竟不足500億元，可見缸邊友實在無心戀戰。

恒指低開17點，20633已經係半日高位，低開低走，其後跌幅擴大至255點，見20394半日低位，但50天線(20302)有支持，守得住50天線跌幅略為收窄，重返10天線之上。半日恒指收報20549，跌100點；國指跌48點；恒科指跌44點，報4164。半日成交額496.28億元，少得有啲恐怖。

藍籌股個別發展，大笨象(00005)半日跌0.4%；友邦(01299)就算係咁，總算企定住85元。ATMJ只有美團(03690)逆市升1.3%，騰訊(00700)、阿里(09988)齊齊跌0.7%，京東(09618)則跌1.4%。藍籌之中以中芯國際(00981)表現最好，半日升4.6%，主要都係跟返美股嘅晶片股上升。

另外，金沙中國(01928)跟銀娛(00027)同樣係逆市上升藍籌股，由於五一黃金周接近，市場開始憧憬黃金周澳門人流暢旺，資金流入濠賭股，除咗金沙跟銀娛分別升2%及3.8%之外，其他濠賭股全線向上，升幅普遍超過1%。另外金價持續強勢，支持資源價格高企，資源股今日逆市造好，不過現水平再追入，上望空間大減，都係得個睇字。

港股成交縮水到咁，可見目前係買賣兩閒，之前阿Man都講過，二萬樓上追貨值博率有限，可恨嘅係，之前大市落到19000水平，亦未見大量資金流入趁低吸納，港股明顯被遺棄，進入唔生唔死階段，一日解決唔到缺水問題，港股真係無得搞。反而美股多次見到資金逢低收集，倒不如加大注意力去睇美股，勝算將比只看顧港股更高。

麥狄文
(徐狄怡‧證監會持牌人)

後話

玄學大師早前常說下元九運「東升西降」、「福人福地」、「有危就有機」。再加上香港有美譽是為「世界唯一優勢之地」和「聚寶盆」。可無須因個別不順景時刻，而過份解讀至如此灰心的。

細水長流、青山常在綠水長存，時來運轉，定可運轉乾坤，可拭目以待！