TVB距離亞視永恒有多遠?

智取大市｜TVB距離亞視永恒有多遠｜晉佳

2023年8月26日 10:32

TVB（511）喺獎門人嘅英明領導之下，最近又公佈咗一份虧損業績，半年蝕4.07億。從損益表去睇，TVB好明顯係一間為生存而生存嘅企業，談不上係一盤生意。至於幾時會變成「亞視永恒」？就要從資產負債表及現金流量表去睇。

2021年、2022年每年經營現金流出3億，今年上半年，叻仔咗，經營現金流出7,600萬元。換言之，TVB水喉不斷流出，要維持有水出糧，自然搵外人向其注水。今個月，TVB就向基匯資本董事長吳繼煒發行1.56億可換股債券，換股價4.45元。

發換股債好似大費周章，但只係籌得雞碎1.56億！一間有價值、有前景嘅公司，正常唔會輕易發換股債以免攤薄股權，TVB幕後主要股東目前已深深明白，股權開始唔太值錢，於是喺自己可能要掏腰包、或四圍拍門搵新股東之前，有人肯灌水就自然無任歡迎。

TVB表面睇財政不是十分不健全，條命仍比佢昔日嘅內房大客長得多。不過，今年6月底有形淨資產27.5億當中，包括越嚟越唔值錢嘅節目及影片版權15.5億元；至於物業、器材及設備12.78億，如果物業比例高，尚算穩健，可惜，TVB每年折舊成4億左右，而睇返TVB嘅折舊計算方法，傢具、裝置及器材嘅折舊率5%至50%比例最高，可以想像傢具器材佔固定資產嘅最大部份，變現價值低。至少大家可能都知，將軍澳電視城塊地喺租用的。

有形淨資產負債比率50%，但呢個看似健康嘅負債比率，能夠頂多久？現金加存款8.86億元，加上上述換股債集資1.56億，目前大約10億左右，以經營現金流每年燒走3億、每年畀利息1億計，僅夠燒兩年半。

財政情況越差，就越難搵投資者，以目前燒錢速度睇，或許2025年嘅某一天，會有人吹緊TVB就嚟出唔到糧，到時TVB再透過聲明「澄清所有不實揣測」，大家毋須太驚訝。

TVB北上搵銀早已證明是死路一條，今年上半年業績顯示，TVB香港收入按年跌14.3%，內地收入跌22%更慘烈。究竟未來係收入跌得快、定係裁員裁得快？我剩係知收入越少、還款能力會越低、財政惡化得越快。

獎門人啱啱做完個手術，否認離職云云。我冇理佢究竟管理得公司有多好，但憑有一日無意中睇到，獎門人靠一己之力毁掉了遊日金牌主持周奕偉個節目，就知獎門人嘅破壞力。

去到2025年，獎門人七十有二，希望唔使見到佢最後關頭留守TVB嘅狼狽狀況。

後話

業績奇差人意，要改革卻不換高層？舊酒用新瓶？