滙豐御用風水師談總行佈局

中環在線：滙豐御用風水師談總行佈局 銅獅原來坐鎮後門

17,645

88
適中字型 較大字型	■滙豐總行喺正風水靚位。

■龍景銓乃滙豐御用風水師，作風低調，難得一見他真面目。

堪輿大師龍景銓喺上世紀七十年代已經開始為滙豐銀行擔任風水顧問，𠵱家中環滙豐總行嘅風水都係由佢佈局。今年一月底，中環滙豐總行增添兩隻石獅子，亦由佢負責計算風水擺位。
滙豐為慶祝一百五十周年，喺中環總行有多項新佈置，令到七十五歲嘅龍景銓忙得不可開交。龍師傅透露，英國人比中國人更加相信風水，新近擺放嘅石獅子與一個三層樓高嘅米形藝術品，滙豐都要佢幫手搵風水位擺放。

一對石獅無開過光

不過，呢兩件新擺設係冇催運或者擋煞等風水作用，純粹係紀念性質，龍師傅話「石獅子要開過光、點過睛先至帶有吉利作用，而呢對石獅子就冇開光嘅，純粹係古董，做紀念」，但由於擺放位置屬於吉利嘅風水位，行人路過摸一摸應該都可以沾上好運。
提到呢對面向皇后大道中嘅石獅子，龍師傅仲爆料話，呢個位置其實係滙豐總行嘅正門，一直放緊一對銅獅子嘅位置先係後門。
龍師傅指，滙豐總行嘅位置處於太平山其中一條龍脈嘅穴位，屬於「倒騎龍」格局，風水相當好。對住皇后像廣場嗰邊屬於滙豐總行嘅後門，「以前未填海，前面冇嘢阻擋，叫做海光入煞，所以要擺兩隻銅獅子擋煞」。
有化煞，自然亦有招財位。面向皇后大道中嗰邊，有六棵三層樓高嘅樹原來有招財作用，有助滙豐吸財氣。
雖然話滙豐總行喺正風水靚位，但滙豐近年不斷被各式各樣嘅負面消息困擾，股價低迷，咁又點解呢？龍師傅就不以為然，佢始終認為，滙豐總行嘅風水十分好，深信滙豐快將走出陰霾。