人氣風水師傅七仙羽近年憑搞笑和親切形象極速上位，不但接綜藝節目接到手軟，更升格做廣告女王，又搞唱笑會又進軍電影圈，新戲《猛鬼3寶》宣傳如火如荼，同張敬軒、鄭欣宜、MIRROR等紅星都熟稔，七師傅長䄂善舞，曾自爆太高調惹行家眼紅落降頭針對，未知是否因事業再上一層樓，七師傅竟再惹來行家多番追擊！
事源是，有風水師傅爆料指，近日受一位有線電視監製邀請，與香港硬地滾球傷殘運動員何宛淇合作拍節目。該監製表示，因有見玄學界有不少「害群之馬」，「想俾市民認識好嘅玄學師傅，唔係想邀請你做Artist呀。」
這位名為許果朗的風水師傅今日於Facebook上載一段錄音對話，片段中該監製發送了何宛淇的資料給許果朗，指希望邀請5位玄學師傅作嘉賓，許果朗拒絕後，監製隨即解釋發出邀請原因：「（想）今次由呢位殘奧得主何宛淇嚟帶出良心經營嘅玄學師傅。」
他指希望許果朗考慮是否想幫人，「始終點解我哋開呢個節目嘅原因，係因為每一個行業都好嚴重良莠不齊嘅現象，喺三年嘅疫情底下，喺呢個市道下更加多人篤信玄學，但當中都可能有你哋行內嘅害群之馬，令好多市民蒙受損失，所以我哋希望藉住運動員嘅公信力嚟畀到市民一個好嘅選擇。」
該監製強調：「唔係話去到邀請你做Artist，唔好誤會咗先。咁我都知你唔係Artist，係師傅嚟㗎嘛，睇下你哋想唔想由奧運（亞運）金牌得主介紹你哋，等多啲人認識你哋。」許果朗質問：「等人認識我，定係幫大眾受騙？不受騙。」監製繼續說服對方，指每位師傅都經他嚴格挑選，「觀眾睇完個節目，如果佢哋都想搵一啲師傅幫手嘅，佢哋都想搵奧運金牌運動員介紹過嘅師傅呀，定佢哋都唔知係乜嘢嘅師傅呀？」、「唔好嘅（師傅）我都唔搵」。
監製希望邀請許果朗到有線電視大樓開工作會議，他說：「因為我必須要親自認識咗果朗師傅你，至可以正式幫你落實，因為我都有責任幫運動員去把關。」許果朗最終以「冇興趣」為由拒絕。
許果朗發文炮轟，似乎為錢不滿：「話我有良心可以幫人，我已經好客氣推架（㗎）啦，又話我太謙，既然有名氣咁當然係收錢啦，我去澳門拍玄學節目，每一集都有錢收呀！」又怒斥被指靠何宛淇上位：「仲話我要靠何小姐先可以比人認識！咁究竟係你要我幫市民？定係何小姐幫我呀？如果我要何小姐幫先有生意，咁我就唔係因為有良心才有人幫親啦！已經係一個不折不扣的神棍啦！如果係咁又何來良心企業呀！」
他無端拉人落水，意有所指道：「真係唔好當我LuLu！我個名冇七字架（㗎）！」、「我個名冇七字呀，你搵有七字個（嗰）位啦！」許果朗更公開呼籲何宛淇接拍節目前先三思。
許果朗曾亮相潘紹聰的網台節目《恐怖在線》，又曾接受傳媒訪問。翻查許果朗Facebook，這並非是他首次提到其他風水師，去年10月一篇文章中他以「數字仙女毛」稱呼並攻擊對方冇料。惟許果朗亦曾被公開投訴算命不準又收得貴，「完全冇料，乜都答唔到。」
《香港01》就此事查詢七師傅，七師傅直言不認識許果朗，並大方回應：「不值一提🙏」盡顯高EQ！
原文網址: 有線監製邀亞運金牌何宛淇介紹風水師？ 錄音曝光遭怒斥欺騙市民 | 香港01 https://www.hk01.com/article/826863?utm_source=01articlecopy&utm_medium=referral
後話
上文句「（想）今次由呢位殘奧得主何宛淇嚟帶出良心經營嘅玄學師傅。」 ？？
這是何類的邏輯？犯上深層次的矛盾？
殘奧得主何宛淇的知識和公信可在運動界項目和人事上，並非在玄學界！！須知，有良心經營嘅玄學師傅不一定有足夠真材實學！而玄學師傅有真材實學的可不一定有良心！如此，殘奧得主何宛淇如何有能力去品評何玄學大師有真材實學？有真的良心？
世上並無公認的良心指標，各人的良心指數認可性也各不同！尤其是滲入了功名利祿因素。
玄界江湖風風雨兩，混進娛樂界可笑裡刀，事是事非，更是搵食非易，並非有真材實學玄功術數學便是必勝一技。
没有评论:
发表评论